一分鐘瞭解現今教育制度

(轉貼自 媽媽谷分享, 原題為: 簡短解釋現今教育制度)

唔計國際學校，本地課程分:
1. 官立 / 資助 (佔九成以上小學)
好處係唔洗面試、免費、學生廣泛，壞處係多功課多測考，教學方法守舊，愛心老師唔多，同語境麻麻。報考方法第一輪係計分制 (不分學區)，即父母係舊生、同信仰 (要有証明，部分學校要求同宗派) 等加分，另有兄姐同校必收。扣除以上，餘下學位不多。好現實，好的學校 (即升Band 1中學有保證) 好多人爭又好少位，計分輪唔到就要按居住地區依籌號派位，俗稱大抽獎，因真係睇彩數。好的學校冇位，你就會好大機會派去麻麻地的學校，咁會直接影響升Band 1中學的機會率。

2. 直資私校
A. 傳統教學。好處係升Band 1中有保證。壞處係教學模式都係催谷，多功課測考，壓力大。要比學費，平均幾千一個月。要面試1 - 3輪，幾百人爭一學位，面試主要考學術。
B. 活動教學，俗稱happy school。好處係教學方法活潑有趣D，部分學校有中學部直升，令小學面對較少的評核壓力，同呢類學校老師相對上較有愛心。壞處係升Band 1中冇保證，因冇操開。學費平均幾千一個月。要面試1 - 3輪，每校都幾百人爭一學位。

大家又諗，考小學都要諗埋升中？錯，係讀幼稚園已要諗。點解呢？因在香港教育制度下，升中係100%睇成績。傳統小學為了保住自己的名聲，紛紛教早一年或兩年 (即小一學小二或小三課程) 同不斷測考默書來操練，而呢個氣氛已漸漸傳染活動教學的小學。好多學生為保競爭力，被安排補習，但補習唔係教你理解，只係教你睇題目同背書。整體來講，小朋友又累又唔開心又大壓力，同時思考力一步一步被剝削。

你會諗，唔好讀名小啦咁。如果有咁簡單就好，現實係一級小學想保持在一級、二級想升一級，三級想升二級，即每間學校都在谷。

跟住大家又會諗，傳統催谷的方法令大人小朋友都為功課測考崩潰，小朋友日讀夜讀冇得玩，影響身心發展，就不如讀活動教學啦！首先，考得入唔易，第二，入到要面對兩大問題:
(i) 活動教學需要父母更多時間參與，包括促進、引導、合作等，因大多要求小朋友自己尋求資訊、理解、分析、整合再報告。父母有冇呢個時間同能力呢？
(ii) 唔催谷，即冇為小學全港評核同呈分 (小三至小六共有多個) 作操練、準備，咁成果唔方好，咁你都唔洗旨意入Band 1中學啦。點解呢樣咁重要？因為升大學又係睇中六公開試，又係谷。如活動教學冇谷開，升大學機會又低一截了。

所以，除非你咁型唔理升中咩band，又唔理入大學的比率，又或打算遲早外國升學，否則明白遊戲玩法的，就諗清楚揀咩學校。

#育兒實用資訊